Blog
ОЕМУЦ Св. Наум Охридски > Blog > Вести > Доделување на дипломите на матурантите од генерацијата 2024-2025
Доделување на дипломите на матурантите од генерацијата 2024-2025
- August 27, 2025
- Posted by: ОЕМУЦ „Св. Наум Охридски“
- Category: Вести
No Comments
Драги матуранти од генерацијата 2024/25, почитувани колеги, родители и пријатели,
Пред сè, дозволете ми да ви честитам од срце. Ве замолувам за еден громогласен аплауз за вас, за вашата истрајност, труд и успех.
Вечерва стојам пред вас исполнет со гордост и благодарност. Гледајќи ги вашите насмеани лица, чувствувам дека заедно сме успеале.
Во изминативе четири години, вие не само што се здобивте со знаење, туку и со реални вештини, благодарение на дуалното образование — модел кој го трансформира воспитно-образовниот процес во нешто живо, применливо и блиско до реалноста. Преку директна соработка со компаниите, вие учевте од професионалци, работевте на реални задачи и се изградивте како личности подготвени веднаш да се вклучите во производниот процес.
ОЕМУЦ „Св. Наум Охридски“ со гордост го прифати предизвикот да биде дел од оваа модерна еволуција во образованието. Нашиот Центар стана пример за тоа како училиштето и стопанството можат заеднички да создадат генерации кои не само што знаат — туку умеат. И токму вие, матуранти од генерацијата 2024/25, сте доказ за тоа.
Горд сум на секој професор, на целиот колектив, на нашите партнери од компаниите кои ви ги отворија вратите и срцата, заедно да изградиме мост кон вашата кариера. И сега, кога тој мост е зад вас, пред вас е патот — долг, понекогаш стрмен, но исполнет со предизвици.
За сите вас почнува нова фаза од животот и влез во нова етапа на живеењето. Отсега сте свои личности кои сами ќе си го трасираат животниот пат. Пред вас е иднината, пред вас се можностите, па мудро и паметно искористете ги сите шанси, докажете се во вашата струка и дајте го максимумот. Сакам да напоменам дека со успех ги положивте матурските испити со што се стекнавте со дипломи за завршено средно стручно образование што ми причинува посебно задоволство и упатувам искрени честитки за постигнатиот успех. Онаму каде што се постигнува успех, значи дека сите ние во изминативе четири години сме вложувале во вашата професионална наобразба, сме ве ангажирале и сме ве поттикнувале за исполнување на задачите и активностите за денес да станете возрасни луѓе кои се подготвени да запловат во својата кариера.
Но, да бидеме искрени, иако пред четири години не размислувавте на ваков начин, честопати знаевте да негодувате дека од вас се бара многу ангажман, убеден сум дека сега, во овој момент откако созреавте, сфативте дека сето тоа што сме го правеле било за ваше добро, за вие да се оформите како личности, општествено одговорни и да придонесувате во развојот на нашата татковина Македонија.
Драги матуранти, ќе носите одлуки, ќе градите патишта, ќе се докажувате. Но никогаш не заборавајте: училиштето е вашиот втор дом. ОЕМУЦ „Св. Наум Охридски“ ќе остане засекогаш дел од вашата приказна.
Сè што е убаво кратко трае, но спомените остануваат. Ова не е збогум — ова е „се гледаме наскоро“. Вратите на Центарот остануваат отворени, а ние — вашите професори, вашите ментори — секогаш ќе бидеме тука за вас.
Во мое лично име и во име на целиот колектив, ви честитам на матурирањето. Бидете храбри, бидете чесни, бидете свои. И пред сè — бидете живи и здрави!
Честито, матуранти од генерацијата 2024/25! 


















